Heb 3 | BDD | STEP | Ciyagwao, 'omi ma taugu Yehoba 'ihesinuwegita 'ina tupwa weyahina, 'ilobwaineya ma Yesu tanuwatuhuyahi, weyahina tauna 'ida tapwalolo 'ana tohepwaila ta wete 'ida topwaoli madouna,

Hebrews 3

Yesu Mosese 'ilohane sineya

1 Ciyagwao, 'omi ma taugu Yehoba 'ihesinuwegita 'ina tupwa weyahina, 'ilobwaineya ma Yesu tanuwatuhuyahi, weyahina tauna 'ida tapwalolo 'ana tohepwaila ta wete 'ida topwaoli madouna, 2 ta 'ihetapeweya 'ina paihowaina Yehoba 'i'ebwaeya, gide mwalona Mosese* 'ihehetapewa 'esa Yehoba 'ina hada 'oina.

3 Coinega Yesu hepwatu madouna 'ilobeya, ta Mosese 'ana hepwatu tupwanamo tuwa, hesi gide tuwa hada bwebwe'ana, geya hene hepwatu madouna 'ida lobeya, ma hesi 'ana to'abi. Ta Moseseina gide hada, ta Yesu to'abi.

4 Moisa, hada 'aigeda 'aigeda 'adi to'abi simiyamiya, ta ginaula mabwaiyadi 'adi topaihowa Yehoba.

5 Moseseina Yehoba 'ina hada 'ihehetapewa, topaihowa gide, ta Yehoba 'ina gwaeyao ginaulaedi 'abwa silatu weyahidi 'ihepwaila latuhediya. 6 Ma 'iyamo Keliso Yehoba 'ina hada 'ihetapewa, geya topaihowa gide, ta hesi tauna natuna moisa. Tauda taboi Yehoba 'ina hadaina tuwa, 'eguma tahemisa hataya ma'ida 'atepatu ta ma'ida yaliyaya.

Yehoba 'ana bodao tahe'aiyawasi

7 Coinega Yaluyaluwa Tabuna 'ihegwaegita 'igwaeya,

“Nata, 'eguma 'enana wahesagohe, 8 sahena wadebadeba pa'ala gide tubumiyao mwalo hene yoho 'awawa 'oina sitohogauwa ta 'igu loina silogwahatediya. 9 Weyahina bolime poti 'oidiya 'igu paihowa waiwaidi baibaiwadi si'itediya, ta tubumiyaowedi 'idi lomugiyega sitohogauwa ta weyahidi ya'ala'i'iwasa, ta yagwaeya, ‘Tuta mabwaiyana taudi 'idi nuwatuhuwega sitautauya pui, weyahina 'igu 'eda geya sisanapu.’ 11 Coinega yagamwasowalediya ta yaloina pa'alediya, yagwaeya, ‘Sahena wete 'igu 'ebe 'aiyawasi 'oina siluhuluhu.’”
12 Ciyagwao, wa'itayahigomi ma sahena wadebadeba pa'ala nuwana walolopui, 'amuge ta Yehoba mayawasina wamiyasine.

13 Ma bewa tuwa waboimimo wahelemalema sabwelo 'aigeda 'aigeda 'oidiya, ta 'oinega sahena mumuga galana 'i'abowegomi ta Yehoba 'enana walogwahate.

14 Tauda mwalo 'ida hemisa Keliso 'oina talaguya, ma 'eguma 'ida hemisaina ta'abiyahi bwaibwaini ma 'ana siga tuta 'ana 'ebelosaloha 'oina, Keliso ba'idadai tayaliyaya mahemahetena. 15 Gide Buki He'asisi 'ina gwae 'igwaeya,

“Nata 'eguma Yehoba 'enana wahesagohedi, sahena wadebadeba pa'ala gide tubumiyao mwalohene 'igu loina silogwahateya.”
16 Taiyawedi Yehoba 'ina gwae sihesagoheya ta silogwahateya? Taudi Mosese Itipita 'oinega 'ihanugetediya ta silatuma, 'awa?

17 Taudi weteyage bolime poti 'oidiya 'idi mumuga galadi weyahidi Yehoba 'i'ala'i'iwasa, 'oinega togalaedi yoho 'awawa si'ama'amasa hegumwala.

18 Weyahina taudi 'ina gwae geya simuliye, 'oinega 'adi gwae 'igwaeya,

“Geya'abwa wete 'igu 'ebe'aiyawasi 'oina siluhuluhu.”
19 Coinega tasanasanapu 'abehega taudi geya sida luhuwa, weyahina geya sihemisa.